قصة فلاح بسيط وفلوس التبن بتاع القمح

 منقولة من صفحة جمال الريف المصرى على فيس بوك 

امبارح قبضت فلوس التبن بتاع القمح وحطيتهم في سيالة جلابيتي بعد ماعديتهم تحت التوته لقيت الجو طراوه فرشت شوية قش ونمت زي المسطول وما روحتش البيت الا بعد المغرب

اليوم الصبح مراتي خدت الهدوم تغسلها سألتها فين الفلوس قالتلي مالقتش فيهم ولا جنيه

زعقتلها وقلتلها ازاي دا انا عاددهم بأيدي

وبسرعه افتكرت التوته الساعه كانت 9 صباحا والحمد لله لقيتهم في مكانهم وجنب منهم غراب واكرمكم الله كلب نايم في ظل التوته 

اول ماشفوني طاروا وجروا

عديتهم لقيتهم با لأستك بتاعهم حطيتهم في جيبي تاني وقلت سبحان الله المال الحلال مايضيعش 

رنيت علي صاحب الجرار اللي حرث ودرس

وكلمت بتاع الضمامه اللي ضم الارض وكلهم جوني تحت التوته وخدوا حسابهم 

لأن ابويا عودني لما نحصد مانأجلش الحساب كل واحد ياخد حقه بتاع الحصاد والدراس والنفر والمبيدات كل واحد سلفك و صبر عليك كتر خيره وحتا لوما ممعكش اليوم رن عليه وطمنه واستأذنه في كام يوم تاني

قالي يابني فرحة الانسان لم ترن عليه مش هو اللي يرن عليك وياخد حقه بيدعيلك بالبركه وماحدش حيتغني من فلوس الناس دي حقوق لازم توصلها

ومابالك لما ربنا قال وأتوا حقه يوم حصاده

والملك اللي كل يوم ينادي اللهم اعط كل ممسكً تلف واعطي كل منفقً خلف

الحق مش زكاة الزروع بس الحق في كل شئ حق اخواتك في الميراث حق النفر اللي شغال حق بتاع المبيدات والاسمده والألات اللي أجرتها 

واستغربت من الفلوس اللي احنا عاملين لها قيمه ان قيمتها في سمعتك بين الناس انك مايبقاش عليك جنيه لحد

قيمتها انك تفرج بيها كربة انسان انك تستخدمها لاغراضك الشخصيه بدون مبالغه

والله لو الفلوس لها قيمه كان الغراب والكلب اتعاركوا عليها وعملولها قيمهلا

لكن عرفت ان ضل التوته عندهم له قيمه عن الفلوس 

وعرفت ان الدنيا فيها كلاب فلوس وغربان من البشر عايزه تتقاتل علي الفلوس للاسف

والحمد لله اني وصلت لمرحلة ادمان التوته زي ادمان الجمل ودودة الحرير 🐪🐛😎