موضوع سقوط مكروباص كوبري الساحل ده موضوع مريب فعلا ويستحق شوية تفكير
موضوع سقوط مكروباص كوبري الساحل ده موضوع مريب فعلا ويستحق شوية تفكير .
اصل بص، الشواهد اللي قدامك كلها بتقول ان فيه حادثة فعلا حصلت، بلاغات وشهود عيان شافوا فعلا مكروباص بيقع وده اللي خلى الاجهزة الامنية تتحرك لانها في الواقع مش هتتحرك على اشاعة الا لو فعلا فيه بلاغ او اتنين عالاقل.
فرق الانقاذ بردو قدرت تخرّج السور الحديدي من النيل وهو بطول ٣ متر، سور ٣ متر حديد ملحوم يمين وشمال واثار خلع وحادثة على قاعدة السور الحجري مش هيقع كدة من نفسه زي ما موضح في الصورة، يعني عندك شهود بيدعوا ان فيه حادثة وعندك كمان شواهد عينية زي السور والاثار، والحادثة حصلت ٢ الضهر مش الفجر يعني في عز النهار وعز الزحمة.
بس في المقابل، مفيش اي اثر لمكروباص وقع في النيل ولا ضحايا، ولا بلاغات لاهل الضحايا، ولا حد من الموقف قال ان فيه سواق مختفي، واحنا هنا بنتكلم عن حادثة في النيل مش في المحيط الاطلنطي يعني، التيار مش بالشدة اللي تجرفهم للبحر في وقت قياسي، ولا فيه اسماك قرش سحبت الجثث واتغذت عليها، ولا النيل بالعمق اللي يسمح بإختفاء مكروباص كامل بركابه في دقايق كدة.
الموضوع مريب فعلا، مابين شهادات الصيادين تحت الكوبري اللي شهدوا بأنهم مشافوش حوادث ولا مكروباصات بتقع، وبين شهود من فوق الكوبري اكدوا انهم شافوا الحادثة بعينيهم، والمشكلة مفيش كمان كاميرات عالكوبري تؤكد الحادثة او تنفيها.
يعني انتا دلوقتي الخيارات اللي قدامك انك يا اما قدام إشاعة تحولت لوهم في اذهان الحاضرين اللي اجمعوا كلهم على حادثة خيالية محصلتش حصلت في عقلهم الباطن بس، او زي ما التقارير الاولية ما بتقول ان الحادثة حصلت بس التيار جرفهم بعيد عن موقع الحادث لسبب ما وممكن كان مكروباص فاضي فا مفيش ضحايا او بلاغات.
او نسرح بخيالنا بقا ونقول وقعوا في فجوة زمنية وتلاقيهم دلوقتي بيحضروا حفلة لام كلثوم مثلا في الستينات، او ان المكروباص نفسه من الماضي ودخل في فجوة زمنية في الخمسينات لقى نفسه في المستقبل وظهر فجأة فالسواق فقد التحكم في عجلة القيادة وخبط السور ووقع وبعدين اختفى ورجع زمنه.
يعني عندك موقع لحادث، واثار ملموسة متمثلة في سور واقع في النيل، وشهود اكدوا الواقعة، بس مفيش حادث ومفيش مكروباص ومفيش ضحايا، فهل ده خيال عام للحاضرين؟ شافوا طاقة اتمثلت في صورة مكروباص بتخبط السور فعلا واختفت؟ ولا كل ده كدب ومفيش حادثة اصلا؟ الموضوع مريب واللي مخليه مريب اكثر حوار السور اللي وقع في النيل ده، الموضوع محتاج بحث وتفسير اكتر من كدة.
بعيدا عن الخيال بتاعي ده، فا الافتراض الاكبر دلوقتي ان مفيش حادثة حصلت فعلا وان السور وقع والناس اتخيلت ده، ودي في حد ذاتها مشكلة لوحدها، بس خلينا نشوف الموضوع هيوصل لايه.
