وزارة التعليم بتدرس عمل منهج جديد اسمه وظائف المستقبل ويدرس لطلبة المرحلة الإعدادية

المنهج ده عبارة عن إيه؟.. 

باختصار شديد المنهج ده بيقول للطالب إن وظائف المستقبل كذا وكذا وكذا.. وبيقوله إن الوظائف اللي موجودة حاليا هتنقرض بمرور الوقت، ودي بقى الوظائف اللي هتكون موجودة وقت انت ما تتخرج، وبدل ما تبقى عاطل عن العمل، اختار لك تخصص يؤهلك لإحدى وظائف المستقبل دي.. المنهج بيقول للطالب شوف انت بتحلم تشتغل إيه من الوظائف دي، ومطلوب منك يبقى عندك مهارات كذا وكذا علشان تشتغل في الوظيفة المستقبلية دي.

طبعا أغلبنا، وربما كلنا، مش عارفين المستقبل هتبقى الوظائف فيه شكلها إيها، وإيه طبيعتها ونوعها، وإيه المطلوب من كل طالب علشان يوصل لها.. وده اللي المنهج الجديد هيعمله.

= المنهج الجديد هيشرح للطالب كل وظيفة مستقبلية ومزاياها والتخصص التعليمي اللي الطالب المفروض يدخله علشان يوصل لها، بدل ما يتعلم بالصدفة ومايكونش له هدف هو وأسرته ويلاقي نفسه في الآهر خريج عاطل عن العمل.. باختصار هتقوله دي الوظيفة اللي هتبقى موجودة بعد ٥ سنين أو عشر سنين.. ركز في كذا من دي الوقت علشان توصل لها لأن الوظائف التقليدية هتختفي.

= كل الدراسات الدولية بتقول إنه خلال ٥ سنين هتكون ٣٥٪؜ من الوظائف الحالية هتنقرض، وخلال ١٠ سنين هتنقرض ٤٥٪؜ من الوظائف، وبالتالي لازم الطالب يعرف إيه هي الوظائف البديلة اللي محتاجها المستقبل.