موت البط كله خلاني احس بالعجز اللي فضلت امي طول عمرها تداريه عني

الكلمة دي كانت ثقل علي نفسية طفل مثلي كانت بتجيب البط الصغير وتربيه في الأوضة بتاعتها وتنام هى في الصالة 

وكان عندها مراحل عمريه مختلفة للبط بحيث يبقي عندها علي الأقل كل أسبوع بط جاهز للبيع ، كانت تقوم قبل الفجر بساعة تصلي ركعتين لله وتدخل الأوضة تجيب كام بطه وتحطهم في سبت وتمشي ، كنت بدعي ربنا ديما تروح عليها نومه ومتروحش تقعد في السوق ببط تاني ولكن ربنا عمره ما قبل الدعوة دي مني.

حياتي كانت صعبة، نربي البط ومنأكلوش، يتريقوا عليا أصحابي ومقدرش أتكلم معاها لاني بحبها 

لحد ما في يوم وهى طالعه وشايله السبت علي دماغها وقعت في الارض وندهت عليا ألحقها، يومها أنا عيطت كتير وظنيت أنها وقعت بسبب الدعوات اللي كنت بدعيها إنها متصحاش للسوق ،رجلها اتلوت وبردو مرضيتش تقعد وجابت جلابيه قديمة كانت عندها وأخدت الكم بتاعها وربطته علي رجلها ورفعت السبت علي دماغها ومشيت تعكز من رجلها وكملت وراحت السوق 

يومها قولت لنفسى هى ايه اللي يجبرها علي كدا وايه يخليها تنضف تحت البط وتحطله يأكل وتخاف عليه 

فضلت بردو ادعي انها تبطل الشغلانه دي عشان زهقت من كلام صحابي وانها جيبالي الكلام من الناس 

و في مرة تعب البط اللي هى مربياه ومات وفضلت تعيط بحرقه عليه أنا يومها فرحت جداً انها مش رايحه السوق والبط مات وفضلت اقولها هو مش ابنك اللي مات متعيطيش. 

بس بعدها عرفت كويس أوي هي عيطت ليه  

لما طلبت منها كشاكيل جديدة للمدرسة مكنتش معاها 

ولما طلبت مصروفي مكنتش معاها 

ولما طلبت شبشب جديد بدل اللي اتقطع مكنتش معاها

حتي الآكل اللي كنت بتريق عليه مبقاش موجود 

موت البط كله خلاني احس بالعجز اللي فضلت امي طول عمرها تداريه عني، وعرفت وقتها انها هى اللي مستحمله كلام الناس ومستحمله التعب علشاني وعلشان تعلمني 

أنا حاليا كبرت والكلام دا فات عليه سنين بس الفرق اني بقيت اربي معاها البط بكل سعادة، بقيت فخور بشغلها وبصحى قبلها احط البط ف السبت واشيله قصادها لحد السوق ومبعملش حساب للكلية ولا لشكلي لأني بدون تربية البط دا مكنتش هتربى ولا هبقى الراجل المتعلم دا، ومش بس كدا اوقات كتير بقعد ابيع معاها واصورها واتصور معاها ❤❤

#وليد_يسري

waleed yosry