توضيح وتفسير لحساب شرايح واستهلاك الكهربا وخصوصا لمستخدمين العداد الكارت
السلام عليكم ورحمة الله وبركاته
ده توضيح وتفسير لحساب شرايح واستهلاك الكهربا وخصوصا لمستخدمين العداد الكارت
....
الاول فى مصطلح مهم لازم تعرفه وهو
الكيلووات ساعة KWH دى وحدة قياس الطاقة الكهربية ودى اللى العداد بيعدها وبتتحاسب على اساسها
....
انت كمستهلك العداد بيركب عندك وفنى شركة الكهربا بيظبط الساعة والتاريخ ع العداد وبيفعل التيار والعداد يشتغل ويبدأ يعد وعلى حسب كل شريحة ومقدار استهلاك بتبدأ كمستهلك تتنقل من شريحة للى بعدها..
مثلا انت مستهلك ضعيف للكهربا ومفيش عندك لا تكييف ولا سخان كهرباء ولا كاتل ولا مكنسة ولا... بالتالى هتفضل مكمل ف الشريحة الاولى أطول فترة ممكنه وبتتحاسب على سعر الشريحة الأولى
👈الشريحة الاولى من 0 ل 50 كيلووات ساعة بسعر 48 قرش للكيلو
.. جميل .. خلاص استهلاكك عدى 50 كيلووات ساعة ودخلت الشريحة التانية هتتحاسب على سعر الشريحة التانية
👈الشريحة التانية من 50 ل 100 كيلووات ساعة بسعر 58 قرش للكيلو
طب انت ف الشريحة التانية والشهر خلص ايه اللى بيحصل؟.. اوتوماتيك وبدون ما بتعمل اى حاجه العداد بيرجع للشريحة الاولى وتتحاسب من اول وجديد بسعر الشريحة الأولى لحد ما تخلصها وتدخل شريحة تانية وهكذا....
طب انت كمستهلك عندك أحمال كتير وبتستهلك أكتر وبتوصل لشرايح أعلى
بتستهلك الشريحة الاولى بسعرها خلصتها... بتستهلك الشريحة التانية بسعرها خلصتها... ركز هنا ركز كويس
مع دخولك الشريحة التالتة بتحاسب ع الفرق فى الشريحتين الاولى والتانية بسعر الشريحة التالته بمعنى
👈الشريحة الاولى من 0 ل 50 كيلو بسعر 48 قرش
👈الشريحة التانية من 50 ل 100 كيلو بسعر 58 قرش
👈الشريحة التالتة بتحاسب من 0 ل 200 كيلو بسعر 77 قرش للكيلو وده معناه انه بيتخصم رصيد قيمته
50*(0.77-0.48)+50(0.77-0.58)=24 جنيه
خصم لحظى من رصيدك بمجرد ما تتنقل م الشريحة التانية للتالته فرق شرايح بعدين بتكمل استهلاكك لنهاية الشريحة التالته بسعرها العادى وبعدين بتدخل ف الشريحة الرابعة ثم الخامسة .... وكل شريحة بسعرها بدون فروق
👈الشريحة الرابعة من 201 ل 350 كيلو بسعر 106 قرش
👈الشريحة الخامسة من 351 ل 650 كيلو بسعر 128 قرش
طب انت استهلاكك وصل لشريحة معينة و الشهر خلص اوتوماتيك برضه العداد بيرجع للشريحة الأولى مع بداية الشهر
ملحوظة مهمة 👌👇👇
... خد بالك بداية الشهر مرتبط بضبط الساعة والتاريخ ع العداد بتاعك يعنى لو الفنى ظبطلك التاريخ غلط او نسى يظبطه فالعداد مرتبط بالضبط بتاعه الغلط وهيحسب عليه وهيرجع للشريحة الاولى عليه
وملوش علاقة باليوم الحقيقى اللى حضرتك بتعيشه ف حياتك ✌️
..
نرجع للحسابات لحد نهاية الشريحة الخامسة واستهلاك لحد 650 كيلووات ساعة فانت بتتحاسب زى ما وضحنا فوق
طب انت عندك ڤيلا مثلا وأحمالك كتير جدا او عندك تكييفات كتير وكذا سخان كهربا ودخلت الشريحة السادسة تبدأ تعد م الأول يا محترم بتسعيرة الشريحة السادسة وهى 🙃🙃🥲
👈الشريحة السادسة من 0 ل 1000 كيلو بسعر 128 قرش
يعنى بمجرد دخولك الشريحة السادسة بيتخصم منك رصيد قدره
200*(128-77)+150*(128-106)=135 جنيه مصرى
خصم لحظى من رصيدك بمجرد انتقالك م الشريحة الخامسة للسادسة بمحرد استهلاكك ما يتعدى 650 كيلووات ساعة
طب انت عديت الألف كيلو ودخلت الشريحة السابعة 😥😰😭👈الشريحة السابعة من 0 لأكتر من 1000 كيلو بسعر 145 قرش
يعنى بمجرد دخولك الشريحة السابعة بيتخصم منك رصيد قدره
1000*(145-128)= 170 جنيه مصرى
خصم لحظى من رصيدك بمجرد انتقالك م الشريحة السادسة للسابعة بمحرد استهلاكك ما يتعدى الف كيلووات ساعة
وباقى الاستهلاك فوق الألف كيلو بتتحاسب بنفس السعر 145 قرش للكيلو
..
👇👇✌️مصاريف خدمة العملاء :
ودى مصاريف بتتخصم من رصيدك على قدر استهلاكك وشريحتك عند نهاية الشهر
الشريحة الاولى ... واحد جنيه
الشريحة التانية ... 2 جنيه
الشريحة التالتة ... 6 جنيه
الشريحة الرابعة ... 11 جنيه
الشريحة الخامسة ... 15 جنيه
الشريحة السادسة ... 25 جنيه
الشريحى السابعة ... 40 جنيه
عند عدم الاستهلاك نهائيا يخصم 9 جنيه
...
...
ف النهاية
أتمنى أكون وضحت للناس الطريقة اللى يقدرو يعرفو بيها استهلاكهم وحساباتهم للشرائح ويفهموا نظام المحاسبة ويستوعبوا ان مفيش حاجه اسمها ارجع العداد للشريحة الاولى او اقلل استهلاك العداد.. العداد ده مجرد وسيلة للعد مش اكتر.. انت كشخص اللى بتستهلك وتقدر تتحكم ف احمالك وتقلل استهلاكك
