ليه فيه خناقة طول الوقت بين " الإسكندرانية" و "غير الاسكندرنية" ؟

 ليه فيه خناقة طول الوقت بين " الإسكندرانية" و "غير الاسكندرنية" ؟

انت متخيل ان الخناقة دي عمرها 2350 سنة ،عشرين قرن ونص من الزمن الإسكندرانية و غيرهم مفيش بينهم عمار 

تعالى نحكي الحكاية من الأول 

لما أنتهت أيام مجد مصر القديمة، وبقت عُرضة للإحتلال بسهولة، الفرس احتلوا مصر، أهانوا أهلها، وأحتقروا ألهتهم، ومهتموش حتى يسيبوا حامية عسكرية قوية.

جه الإسكندر الأكبر مصر ، وضمها لإمبراطوريته الضخمة، راح معبد الإله آمون في سيوة، تم تنصيبه إبن الإله آمون ، أمر ببناء الإسكندرية ،، وسافر تاني 

ومن هنا بدأت الأزمة 

لما بطليموس أخد مصر من نصيبه، أعتبر إن مصر دي عبارة عن ( الإسكندرية مقر الحكم + باقي البلد مزارعين بيزرعوا ) 

الإسكندرية هي مقر الثقافة والعِلم والفنون، ومقر التجارة والإقتصاد ،ومقر الحكم والقصور الملكية ، وباقي البلد ما هي إلّا مزرعة تزرع ونفرض عليها ضرايب ناخدها نصرفها على إسكندرية 

خلص حكم البطالمة بعد 300 سنة ، جه الرومان ، عملوا حامية عسكرية قوية جدًا .مصر 30 إقليم ، عليها " حاكم " قاعد ف إسكندرية يلم ضرايب من باقي الأقاليم ويبعت قمح وفاكهة لروما ..الرومان غيّروا وضع وشكل إسكندرية، بس باقي مصر محدش جه جنبها ، أفضلوا أزرعوا، وحطوا بس في معابد الحكام الجدد ..

وقت البطالمة والرومان كان فيه ( المواطنة السكندرية ) وكانت إمتياز لا يحصل عليه أحد ..

الرومان طبعًا بعد الإحتلال كانت الجنسية الرومانية هي الأعلى والأقوى، بس فضلت المواطنة السكندرية ليها وزنها وقيمتها ،، يعني البطالمة قسموا مصر فئتين ( إسكندرانية وغير اسكندرنية) ، الرومان قسموها مصر 4 فئات ( رومان ، إسكندرانية ، يهود ، مزارعين)

انت متخيل عمق الازمة ؟

سنة 100 ميلادية ، بليني الصغير أحد نبلاء روما المثقفين ، كتب خطاب للإمبراطور الروماني " تراجان " ، بيطلب منه يمنح الجنسية السكندرية للكاتب الخاص بيه هاربوقراط ، لإنه مصري أصيل وبيقوله انت عطفت على هاربوقراط بالجنسية الرومانية، بس بعض القانونيين حذروني ، إنه لازم ياخد الجنسية السكندرية الأول، عشان يكون مُستحق لإمتيازات المواطنة الرومانية 

رد عليه الإمبراطور تراجان قاله ايه بقى ؟

" حيث أنني أتبع سياسة الأباطرة السابقين، فإن سياستي تقتضي بعد التهاون في منح الجنسية السكندرية لأي أحد ، ولكن حيث أنك حصلت بالفعل على الجنسية الرومانية لكاتبك هاربوقراط، لذا أخبرني عن الإقليم التابع له، حتى أكتب إلى بومبيو بلانتا حاكم مصر بخصوص هذا الأمر " 

وعشان إحنا في إسكندرية ناس محترمة أطلقنا إسم الإمبراطور تراجان على شارع مهم جدًا اللي واصل بين ش أبو قير اللي على ناصيته كلية الهندسة ، وفيه ستاد الجامعة، لحد البحر ، قبل ما يتم تغيير الإسم حديثًا 

ولذلك ،عزيزي المواطن الغير سكندري أعذر الإسكندرانية 

الموضوع كان بيحتاج تدخل إمبراطور روما عشان نقول على حد " غير اسكندراني" إنه إسكندراني 

آه بالمناسبة ،، في التقسيم الرسمي للإمبراطوريةالرومانية المثبت في ضرايبها مصر كانت متقسمة بالفعل 4 فئات ( رومان ، سكندريين، يهود ، مصريين ) فكلمة "غير اسكندراني" هنا كانت بتتحسب على كل المصريين الغير إسكندرانية زي ماحنا بنستخدمها دلوقتي .

منقول مع التهذيب😂😂