اللحمة غالية

اللحمة غالية!

صرخنا كتير وقولنا يا ناس بلاش زبح الإناث ،يقولك اسكت كل واسكت الكيلو ب60جنيه قولت لهم بكرة او بعده نشتريه ب200جنيه ،قالولي قول يا فقيه قول يا فلتة زمانك .

مش فقاقة ولا فهلوة يا بيه لا السوق نزل بسبب المستورد وارتفاع أسعار الأعلاف أضعاف أضعاف تمنها مع ارتفاع الدولار الفلاح المسكين بيخسر

قالك خربانة خربانة ،قام بايع البهايم العرض كبير والطلب مفيش وزي ما مدرس الاقتصاد والإحصاء علمنا واحنا في ثانوي ان السوق يحكمة قانون 

(العرض والطلب)

وأبويا كان يقول زينة بس ملهاش سوق ،ده ادي الي نزول الأسعار فاغري الجزارين لدبح الإناث خاصة سواء كانت والدة او عجول عجم اي لم تلد

وهنا يحدث خلل في منظومة الإنتاج حيث أن عجلة الإنتاج الحيواني يلزمها 3 سنوات كي تصبح العجلة ام ولديها صغير يكبر هو كمان.

فلما دبحنا العجلة الشابة التي لم تلد والبقرة الأم وبعنا لحمتها ب60جنيه 

وفرحنا ،قولت وقتها مش هتطول لإني فلاح بن فلاح وعارف الديرة بتدور إزاي.

وقلت 60كتير علي الكيلو بس علي المدي البعيد هنضرب ال60في3اللي هي عدد السنين اللازمة لتعويض الأمهات تلاقي الكيلو متوقع 180وهذا ما لا اتمناه علي الاطلاق .

العملية مش جشع جزار واحتكار فلاح لا دي آليات سوق وقوانينه 

استيراد واقف بسبب الكورونا وقلة معروض داخلي =ارتفاع أسعار اللحوم المحلية .

نستفيد احنا ايه بقي من أزمة الكورونا دي :

دبح الإناث لا إلا بتقرير من طبيب بيطري يقول لا تصلح للعشر.

دبح الإناث جريمة يجب تشديد عقوبتها.

البتلو الصغير لا وألف لا يجب تجريمه .

دراسة إمكانية رجوع نظام التأمين علي المواشي وتوفير الأعلاف المدعمه .

لابد من الاعتماد علي الإنتاج الحيوانى المحلي وتشجيعه وتنميته لأنه آمن الوطن والمواطن.

الاستيراد له ظروفه في اي لحظة يقف تحت أي سبب  والأسباب كتير مرض ما ظروف سياسية أو اقتصادية مع الدول الموردة 

يبقي ميحكش ضهرك غير ضفرك.

مينفعكش غير عجلك بن بقرتك. 

وربنا يعدي الايام دي علي خير.

دمتم سالمين 

محمود السايس